ماما حلـــوة

العصبية والغضب عند معظم الأمهات كااااارثة…..

الأم بتخرج الغضب ازاى؟!!! إما الكبت أو الانفجار، وبالمناسبة ده طريقتى المفضلة  …

• الكبت:

يعنى بتحب تبقى مسالمة وتتجنب النزاع وبتقفل الباب اللى بيجى منه الريح فبتكبت مشاعرها بكل السبل وبتحاول تقنع نفسها بإنها مسيطرة على كل حاجة وإنها خلاص نست اللى حصل وإنها تقدر تستحمل، بس ده تمنه بيكون غالى اوى وتأثيرة سلبى على مشاعرها وجسدها

• الانفجار:

اللى هو «امنا الغولة» يعنى صراخ وتكسير والحاجات الجميلة ديه، بس بتأذى بيها نفسها والأخرين، وده كمان تمنه غالى جداً وبيسيب ندوب تشوه النفس.

بس إطمنوا ماما حلوة.. هية بس عايزة تتعلم أساليب جديدة للتعامل مع الغضب، عشان تحول الطاقة المدمرة الى إيجابيات.

عزيزتى فيه طرق سليمة لإخراج الغضب لو اتعلمتيها ونفذتيها ثقتك بنفسك هتزيد، وهتقوى علاقتك بكل اللى حواليكى، بس خلى بالك مش هتتعلميها بضغطة زر لازم تكرريها وتفشلى وتحاولى تانى كتيييييير حتى تصبح عادة، وانا ما زلت أحاااااول، 

والطرق ديه هية:

1- اللجوء الى الله سبحانه وتعالى والتعوذ به من الشيطان الرجيم.

2- لا تهاجمى ولا تتهمى:

وقت الغضب ابعدى عن اتهام الطرف الأخر لأنه ببساطة هيكون كل همه الدفاع عن نفسه يعنى هيبدأ بتوجيه اللوم ليكى انتى فابعدى عن عبارات ’’انت دايماً’’ او ’’ انت عمرك’’ عشان الموضوع ما يتحولش الى اتهامات شخصية.

3- تعرفى على مشاعرك وعبرى عنها:

اتعلمى تحسى بمشاعرك، وحاولى لمس مشاعر الغضب حين تتملكك، عبرى عنها بدلاً من كبتها، فعليك اخبار الطرف الأخر بما تشعرى بأقصى سرعة، وبكل حزم وثبات، وبلهجة واضحة وصارمة، وبنغمة صوت عادية، قولى ’’انا أشعر بـ’’ بدلاً من ’’ إنت بتعمل وبتعمل’’ وبكده هيعرف الطرف الآخر سبب مضايقتك ومشاعرك الحقيقية.

4- المسى السبب الحقيقى للغضب:

العصبية ديه بتبقى نتيجة مشاعر مدفونة ومكبوتة بسبب التعب الزائد او الألم او عدم الاهتمام والإهمال، دورك بقى تعرفى السبب الحقيقى لغضبك ده وتتعاملى معاه وتلمسى مشاعرك الحقيقية يعنى خوف، ألم، خيبة امل، استياء، عدم أمان…

طبعاً التطبيق العملى للكلام ده ممكن تشوفيه مستحيل مش بس صعب، وان التحكم فى العقل وقت الغضب من رابع المستحيلات، بس صدقينى لازم تحاولى فأنت تستحقى، حاولى مراراً وتكراراً حتى تتحكمى فى ذاتك وفى غضبك وفى التعبير عنه، وعادى جداً انك تغلطى مرات كتيييير معلش حاولى تانى، وبالمناسبة أنا بصرخ للولاد دلوقتى عشان مش مخلينى اعرف اكملك الكلام.. غصب عنى … اللهم أذهب غيظنا، وأجرنا من الشيطان.

إقرأ أيضاَ

علَّمنى إبنى أن أكون زوجة جيدة...!