وفجأة البيبى.. طفلى الصغير بعد ماكان متعلق فى رقبتى طول اليوم بقى مستقل..وجه سن المراهقة، إمتى دخ حصل؟!
باز يطير والطيارة اللى بتطير، بقت آى باد وخروجات مع الاصحاب، الأيام عدت بسرعة، يمكن تكون حاجة مقلقة أوى بس برضه هو لسه محتاجلك ومتشعلق فى رقبتك... إزاااى ده بيقول انه مستقل وعايز يعتمد على نفسه زلياخد قرارات غير عقلانية😣
اهدى بس ... هقولك ازاى ... هو متشعلق فيكى عشان هو محتاج يسمع منك كلمات معينة ...
الأم ليها قوة تأثير كبيرة جداً على ابنها من خلال كلماتها ... ممكن تبنيه وممكن تهده (طبعاً دون قصد) .. تعالى تقولك على اكتر ٣ كلمات ابنك محتاج يسمعهم منك، سواء كان طفل صغير عنده ٥ سنوات او ١٥ سنة.
١- "أنا فخورة بيك أوى"
عايزة اقولك ديه اكتر كلمة تأثيرها كبير اوى على شخصية ابنك، وممكن تخليه يحقق حاجات لا تتخيليها. بالرغم من ان معظم الصبيان مش بيسمعوا بيتصرفوا على طول، بس الكلمة ديه لها سحر على نفس الولد بشكل مش طبيعى ... وجربى وقوليلى😉
٢- " انت ممكن تجرب، انا معاك"
صعبة الكلمة ديه على الامهات بالأخص يمكن بابا فاهم اهمية تجربة الجديد للولد ولوحده، بس ماما دايما عايزة اللى هية شايفاه صح ومش مخاطرة، بس تخيلى لما يسمع الكلمة ديه منك انتى من ماما ... ماما بتقول جرب؟!😯
ايوة الكلمة ديه لها طعم تانى من الأم .. بتدى طاقة، بتخليه يتحمل المسؤولية، بيحس بأهميته، بيبقى عنده ارادة تحقق المستحيل، هتنبهرى باللى هيحققه بعدها... متحمسة اعرف منك تأثير الكلمة ديه على ابنك.
"٣- "ولا يهمك.. انا واثقة انك هتقدر المرة الجاية
احنا الستات من كتر خوفنا على ولادنا وعلى الناس اللى بنحبهم ممكن نقول كلام يجلدهم وخصوصاً الصبيان لما نقولهم "شوفت حصل ايه لما ما ذاكرتش كويس"
الرجل بيتأثر اوى بأى لحظة فشل، يعنى بيبقى محتاج يسمع كلام معين، محتاج يسمع "أنا واثقة فيك وعارفة انك تقدر"
"انا عارفة انك هتذاكر فى اليومين دول وهتعدى الامتحان كويس" ، الكلام ده هيبنيه وهيصدق انه قادر وهينفذ.
اكيد ابنك مش هيبقى مثالى فى كل شئ ... مافيش حد كده... بس الكلمات ديه هتخليه استثنائى هتخليه يشتغل صح، الكلمات ديه هتبنى الراجل العظيم اللى بتتمنى تشوفيه.
ليست هناك تعليقات:
إرسال تعليق